طلب اللجوء عملية مش سهلة زاي ناس كتير بتتخيل، او تحلم.
امثلة ؛
مش معنى انك مسيحي، و الاسلاميين في مصر، العراق او سوريا...... الخ، هتيجي امريكا او اي دولة، و تقول مسيحي من الدولة الفلانية، هيفتحولك باب اللجوء و يقولوا اتفضل سعادتك.
مش معنى انك اخوان و الجيش طايح في الجماعة، هتيجي من الدولة الفلانية، تبرز كارنيه الجماعة، هيقولوا لسعادتك، نفسك السكن يبقى مطل على منظر طبيعي و لا لاء.
التقدم للجوء يعني سعادتك او سعادتها ؛
1- معرض للخطر، على شخصك، و ليس الحال العام للبلد.
بمعنى بيقتلوا في بلد ما اصحاب معتقد معين، فهل عمليات القتل او التعذيب ، انت او احد افراد عائلتك المقربين تعرضوا او مهددين بالتعرض؟؟؟.
مش جار في حي جنب بلادكم اتعرض!!!!.
2- حضرتك او حضرتها، لا مؤاخذة شاذين جنسيا، وفي هذه الحالة، الدولة الي سعادتك مقدم فيها الطلب، بتعمل كشف طبي و اختبارات.
3- سعادتك او سعادتها، غيرتوا معتقدكم الديني، و يوجد خطر عليكم.
و يجب اثبات التغيير و تقديم شهادات و ادلة تثبت التغيير و ده سعادتك اسمه اللجوء الديني و يعتبر من اصعب انواع اللجوء.
4- سعادتك او سعادتها ليكم اراء مناهضة للحكم و معرضين للتنكيل من الجهات الامنية اللذيذة بتاعت بلادنا.
يجب عليك اثبات ذلك، مش معنى اثبات ذلك انك تروح لامن الدولة يدوك شهادة بالاعتقال.
لاء شهادات طبية تثبت اعتداءات جسدية، صور لحالة الجسم بعد التعرض للتعذيب، اشاعات تثبت ان جسم سعادتكم اتلخبط.
و برضوه الدولة الي سعادتكم مقدمين فيها الطلب هتعرضكم على اطباء خاصة بيهم.
5- بلد سعادتكم محطوطة في قائمة الامم المتحدة للدول الغير مراعية لحقوق الانسان، مثال ايران، الصين و كوريا الشمالية..... الخ.
6- سعادتكم عندكم ( لا قدر الله) مرض يصعب العلاج في بلدكم، او يعتبر المرض يعرض صاحبه للايذاء في بلده، مثال ( الايدز) .
7- بلدكم في حالة حرب و يوجد نزوح جماعي، و يوجد اعتراف صحيح من الامم المتحدة بذلك.
ديه اغلبية الحالات الي تقدر تقدم طلبات اللجوء و هما حاطين بطيخة صيفي في بطنهم.
بالنسبة للاختراعات، و تعمل نفسك ذكي، او يجيلك واحد و يقولك انا قلت بلا بلا و دخلت عليهم، كداب مية في المية، او سعادتكم اطلبوا من الشخص ده محاضر و بروتوكولات طلب لجوءه، و انتم هتعرفوا اتقبل ليه.
متسمعش لحد يقولك ادفع كذا و انا عندي واسطة و هعملك و اجبلك، كداب كداب.
لان المحقق زاي القاضي لا يوجد جهة او مسؤول فوق القضاء.
المحققين المسؤولين عن التحقيق في طلبات اللجوء، ناس متمرنة و دارسة و ذو خبرة طويلة في مواضيع اللجوء.
ده غير انهم واخدين دورات في الطب النفسي.
يعني المحقق يقدر يلفك في ثواني اثناء التحقيق، و طبعا المصير هو الرفض بالثلث.
لو عندك فعلا مشكلة تحتاج تقديم طلب اللجوء، يكون معاك مستنداتك كاملة، شهادة الميلاد، جواز السفر، الشهادات الهلمية و الدراسية و طبعا تقارير طبية، محاضر او اي شيء يدل على صحة موقفك.
متسمعش لحد يقولك ، اوعى تقول كل حاجة قدام المترجم عشان بيسرب على السفارة الخاصة ببلدك.
المترجم شخص محلف امام محكمة و يقع تحت مراقبة الجهات الامنية، و لو بيسرب حاجة زاي كده، خسر شغله و اتعرض للمحاكمة الجنائية.
يعني راح ورا الشمس.
من حقك الاستعانة بمحامي، و احسن حاجة تستعين بمحامي من منظمات معنية بشؤون طالبي اللجوء، لسببين،
1- تكون مطمن انه هيقوم بشغله و بس.
2- توفير في المصاريف، لان المحامي الخاص هيدبحك فلوس.
من اول ما تقدم لجوء الى ان يبت في طلبك، موضوعك هيعامل بسرية تامة، و مفيش حد هيكون على علم باي شيء سوى انت، المحامي و المحقق.
بتحب تتكلم كتير و تحكي للناس عشان تساعدك، ذنبك على جنبك.
المساعد هو الله اولا و اخيرا و انت، فقط لا غير.
النصيحة الاخيرة؛
مش معنى كلامي الي فات تقفيل الباب في وشك، لاء، ديه نصايح عاوز تاخد بيها خد، مش عاوز انت حر، حاجة ترجعلكم.
